Iznad Vojnoseljskog katuna nalazi se jedan od vrhova Velikog Hrida. Vrh je obrastao borovnjakom i molikovom šumom, koja je stijenama i grebenima ispresijecana na veće i manje krpe.
Nekada, davno, je na rudinama Havine vode, po Katuništima i u rijetkoj šumi Grohotljivice i padina toga vrha čuvao jedan čobanin ovce. Bio je kopiljan, a uz to i vrlo ružan. Negdje u stjenovitim njedrima toga vrha nalaze se pećine u kojima se za vrijeme nevremena sa stokom sklanjao. Do sada ulaz u te pećine niko nije našao. Volio je taj mladć Zelenu, ali je ona za to nije znala.
Voljela je Zelena nekog drugog mladića za kojeg njen otac nije htio da je da već je dao drugom mladiću. Nije htjela da se uda za njega, pa se u jezero utopila kada je sa svatovima kraj njega prolazila i u vilu se pretvorila. Kada je za to kopiljan čuo, često je noću do jezera dolazio i čekao da iz njega izroni jezerkinja vila. Niko ne zna da li je to i dočekao.
Po tom ružnom mladiću ovaj vrh iznad Vojnoseljskog katuna narod nazva Kopiljan.

Izvor: avlija.me; piše: Ramo Markišić

POSTAVI ODGOVOR

Molimo unesite svoj komentar!
Ovdje unesite svoje ime